Paplajahan 11: Indik Welas Asih Sang Hyang Pengardi
(Lukas 15:11-32)
Pengumpamian Indik Bapa Sane Welas Asih
Para anak Parisine lan guru-guru agama Yahudine sering nyingakin Hyang Yesus nampi anak sane madosa dados sisian Idane. Punika mawinan Hyang Yesus iwang ring arepan ipune.
11
11 Malih Hyang Yesus nyeritayang pengumpamian sekadi puniki,
“Wenten anak sane madue kalih oka lanang.
12 Tandina,
okannyane sane cerikan mabaos kapining bapanyane sapuniki,
‘Bapa,
baang ja tiang warisan ane dadi duman tiange.’
Raris warisane kaedumang olih bapanyane kapining makakalih okannyane punika.
13 “Kaceritayang mangkin,
okannyane sane cerikan punika ngadol saluirin duman ipune tur luas ka negeri sane adoh.
Irika ipun ngulah-laku nganggen jinah.
14 Sasampune jinah ipune telas ring negerine punika,
gumine irika keni bencana kakirangan ajengan;
tur idup ipune tiwas.
15 Raris ipun nglantungang uripnyane ring anake sane asli saking irika,
tur anake punika nunden ipun ka tegale miara bawi-bawinyane.
16 Ipun kalintang seduk kantos meled ngajeng dagdag bawine.
Yadiastun ipun kalintang seduk,
nenten wenten anak sane welas ngicen ipun ajengan.
17 “Raris ipun eling tekening deweknyane tur mabaos sekadi puniki,
‘Makejang anake ane maburuh sid bapan tiange motah madaar sakewala tiang dini das mati nandang seduk!
18 Jani tiang lakar luas sid bapan tiange,
tur ngorahang kene,
“Bapa,
tiang suba madosa kapining Sang Hyang Pengardi lan tekening bapa.
19 Tusing ja pantes tiang buin kasambat pianak bapa;
dadiang ja tiang buruh bapa.”’
20 Raris ipun luas nuju umah bapannyane.
“Tatkala ipun kari adoh saking umahnyane,
kacingakin ipun olih bapan ipune.
Krana bapannyane welas kapining okannyane,
bapane malaib nyagjagin raris ngelut lan niman okannyane punika.
21 Raris okannyane matur,
‘Bapa,
tiang suba madosa kapining Sang Hyang Pengardi lan tekening bapa.
Tusing ja pantes tiang buin kasambat pianak bapa.’
22 “Nanging bapannyane ngamanggil pengayah-pengayahe saha mabaos,
‘Enggalang ja jemakang penganggo ane paling melah tur salukin!
Anggonin ja jerijin limane bungkung tur anggonin ja batisne sandal!
23 Disubane keto,
abaang ja tur tampahang ja panak sampi ane mokoh.
Lan ja iraga madaar tur masukarena
24 krana pianak tiange ipidan mati jani suba idup buin.
Ia ipidan ilang jani suba bakat.’
Raris makasami sane wenten irika ngawitin mapesta.
25 “Duk punika,
okannyane sane kelihan sedek ring tegale.
Tatkala mamargi budal lan sampun nampek umahnyane,
ipun mirengang munyin suling lan igel-igelan.
26 Raris ipun ngamanggil pengayahnyane adiri lan mataken,
‘Ada apake jumah?’
27 “Pengayahe punika masaur,
‘Arin ragane sampun budal tur ajin ragane mrentahang nampah panak sampi mokoh krana okannyane kapanggihin rahayu.’
28 Nanging oka sane kelihan punika pedih lan nenten meled ngranjing ka jeroan.
“Raris bapannyane medal saha nunas mangdane ipun ngranjing ka jeroan.
29 Nanging okannyane masaur sapuniki,
‘Dingehang ja tiang.
Tiban-tibanan mekelone suba tiang ngayah buka anake maburuh tekening bapa.
Tusing taen tiang nungkasin prentah bapa.
Nanging bapa tusing taen maang panak kambing aukud ja tekening tiang anggon masukarena ngajak timpal-timpal tiange!
30 Nanging mulih pianak bapane totonan disubane nelahang kasugihan bapane anggona maluh-luhan,
ditu bapa nampahang jelemane totonan panak sampi ane mokoh.’